КОГА МУЗИКАТА ГИ СПОЈУВА ГЕНЕРАЦИИТЕ

Нашето училиште денес беше исполнето со музика, детска радост и прекраснo дружење!

Ни беа гости дечињата од градинката „25 Мај“, кои заедно со својот музички педагог донесоа песна, насмевки и многу позитивна енергија.

Членовите на нашиот мандолински оркестар им ја открија магијата на мандолините и другите народни инструменти, доближувајќи им дел од богатството на нашата музичка традиција. А малите гости возвратија со весели детски песни и ја претворија средбата во вистинска музичка дружба!

Кога традицијата ќе се сретне со детската искреност, се раѓаат моменти што се паметат!

Благодарност до градинката „25 Мај“ за прекрасната соработка. Нека продолжат нашите музички приказни, исполнети со дружење, креативност и многу насмевки!

Со Аквадон, Пет и Еко – ден исполнет со песна, смеа и детска радост!

Денес во нашето училиште имавме едно поинакво дружење!

Аквадон, Пет и Еко ни донесоа многу смеа, песна и забава, а нашите ученици со радост се вклучија во музичката авантура. Се пееше, се танцуваше и се уживаше во секој момент! 💃

Убаво е кога училишниот ден ќе се претвори во ваква весела дружба, исполнета со детски насмевки и позитивна енергија.

Благодарност до „Артленд & Бејби Арт Продукција” за убавото доживување!

Настан по повод Месецот на Франкофонијата во ООУ „Димитар Миладинов“ – Скопје

Нашето училиште учествуваше на свечен настан посветен на Месецот на Франкофонијата, збогатен со присуството на Н.Е. г-дин Кристоф Ле Риголер, амбасадор на Република Франција, како и претставници од Францускиот институт и Бирото за развој на образование.

Ученици од десет основни училишта од Скопје, преку музика, танц и драмски изведби, ја доловија убавината на францускиот јазик и богатата француска култура.

Нашето училиште се претстави со две внимателно подготвени точки:

„Galerie vivante“ – жива галерија 🎨

Креативна претстава на познати француски сликари и нивните дела. Наратор на точката беше Меланија од VIII-2 одделение.

Изведба на песната „Сена“ од Ванеса Паради 🎶

Прекрасна интерпретација од Ивана и Ангелина од VIII-1 одделение.

Настанот беше подготвен со посветена поддршка на наставничките Анета Митевска и Наташа Апостолова (француски јазик) и наставничката по ликовно образование Марија Н. Наневска, кои придонесоа за успешната реализација на настапите.

Настанот помина во инспиративна атмосфера исполнета со ученичка креативност, култура и француски дух. Со гордост го одбележавме Месецот на Франкофонијата и ја продолжуваме традицијата на промоција на францускиот јазик и култура

Предавање за безбедност – „Петардите не се играчка“

Во нашето училиште се одржа едукативно предавање за безбедност со учениците од 6 до 9 одделение, на тема ризиците и последиците од употребата на пиротехнички средства.

Учениците беа потсетени дека безбедноста и здравјето се на прво место, особено за време на празниците.

Биди одговорен – празнувај безбедно!

Изборен предмет – Готвење

Тема: „Во ресторан“

Вчера VII-2 имавме супер искуство! Заедно со наставничките Радица и Роза бевме во ресторан „Потковица“ – Хиподром, каде што се запознававме со „тајните“ на ресторанот: правила на однесување, хигиена, мени, сервирање… сè!

Шефот и келнерите ни покажаа како се поставува маса професионално, како се складира храна и зошто хигиената е закон.

Ние? Прашај, слушај, пробај – баш како вистински млади гастрономи!

Благодарност за гостопримството, вкусната храна и позитивната енергија!

До следната дружба – се враќаме повторно!

“Градиме нови мостови” – Завршна манифестација

На 16 септември 2025 година, општина Бутел и ООУ “Живко Брајковски” беа домаќини на завршниот настан од двегодишниот проектот “Градиме нови мостови” чиj носител е мисијата на ОБСЕ, со поддршка на Министерството за образование и наука, Амбасадите на САД, Холандија, Полска и Луксембург.
Проектот е продолжение на претходните активности на Мисијата, насочени кон меѓуетничка интеграција во образованието, унапредување на демократијата и на социјалната кохезија во државата. Беа вклучени околу 30 училишта и 2600 ученици кои имаа заеднички активности – часови, спортски настани и дружење.
Со пораки за толеранција, заедништво и соработка меѓу учениците од различни етникуми, се обратија амбасадорот на ОБСЕ во РСМ, г. Килиан Вал, министерката за образование и наука Весна Јаневска и амбасадорките на Соединетите Американски Држави и Норвешка, Анџела Агелер и Кристин Мелсом, кои за успешната работа и нашата посветеност врачија плакети на претставниците на училиштата кои учествувале во проектот.
Ова признание е доказ дека преку образование, почит и заеднички ангажман, можеме да изградиме иднина во која различностите нè зближуваат, обединуваат и создаваат посилна заедница.
Нашето училиште со гордост учествуваше во завршниот настан од проектот за меѓуетничка интеграција, каде што беа презентирани активностите и резултатите кои ги реализиравме со учениците. Затоа, посебна благодарност упатуваме до координаторот на Тимот на МИО, Роза Јаневска и наставничката по природни науки и биологија Бојана М.Личева за вложената енергија, труд и ентузијазам, како и до директорката Андриана Младеновска која со својата визија и поддршка овозможи успешна реализација на активностите. НАЈГОЛЕМО БРАВО за учениците од 6-4 одделение кое две години неуморно и со голем труд работеа на овој проект заедно со нивната наставничка Бојана М.Личева. Благодарност и до нашите партнер училишта ООУ „Наум Наумовски Борче“ и ООУ „22 Ноември“, на учениците од VI-в одделение и нивниот ментор Анида кои беа вклучени во сите заеднички активности.

ПЛАНИНАРСКА ТУРА „ПЕШАЧИМЕ ЗА МИР, СОЖИВОТ И ТОЛЕРАНЦИЈА“

На 12 мај 2025 година нашите ученици учествуваа во планинарската тура на Скопска Црна Гора – с. Раштак, во организација на Општинскиот сојуз на училишен спорт на Гази Баба и Грин спорт.

Дополнително беше спроведена и еко – акција за расчистување на околината што беше одличен пример за подигнување на еколошката свест.

Настанот помина во позитивна атмосфера, исполнета со енергија, заедништво и прекрасна дружба во природата.

Одговорен наставник за активноста- Ивица Петрушевски.

Работилница „Зајакнување на училиштата за демократско образование – постигнувања и резултати“

На 07.05.2025 година, во хотелот  „Александар Палас“ се одржа завршна работилница „Зајакнување на училиштата за демократско образование – постигнувања и резултати“, во рамки на проектот „Квалитетно обрзование за сите“ кој Советот на Европа го имплементира од 2023 година.

25-те пилот училишта, средни и основни кои беа дел од двегодишниот проект имаат идентичност во искуствата околу градењето на демократски систем на управување и иновативност од аспект на вклучување на учениците во носењето одлуки, форми на нивно организирање за остварување на права.

Демократското образование создава активни генерации, кои се свесни за човековите права и одговорно се однесуваат.

Демократијата мора да биде еден од основните столбови на образовниот систем. Образовниот процес е алатка за стекнување вештини и знаења, но мора да насочува и кон критичко размислување, кон развивање на одговорност, свесност за човековите права и обврски, кон конструктивност и почитување.

Учесници на оваа завршна работилница беа учениците: Калина Караџоска 8-1 одд. Софија Мијалковска 9-3 одд. и наставниците Роза Јаневска и Вилдана Суљовиќ.

Голема благодарност до директорката на училиштето Адријана Младеновска, сите ученици, наставничките Марија Наневска и Магдалена Павловска, дефектологот Катерина Банџо кои несебично се вклучија и помогнаа во реализирање на активностите предвидени од проектот.

Проект „Мултикултурализмот во образованието“

Проект „Мултикултурализмот во образованието“

Втората работилница се одржа во ООУ „Дане Крапчев“ во училишната библиотека каде имавме можност да се запознаеме со книжниот фонд на библиотеката, видови на литература, познати книги и автори, а се запознавме и со дел од читателите кои позајмуваат книги во библиотеката.

Оттука добивме идеја за создавање на наша КНИГА во која ќе оставиме свој личен печат.

Голема благодарност за споделените искуства кои ги дознавме од библиотекарката Жаклина Атанасовска.

Следната активност се случи во училницата по историја каде повторно заедно читавме, ги споделивме нашите творби со другарчињата, преведувавме и научивме по некој збор на друг јазик.

Следно беше кршење со јајца каде на своите другарчиња им ги покажавме обичаите за прославување на празникот Велигден, а потоа правевме дизајни за насловна страна на нашата КНИГА преку ликовен цртеж.

И на крај до сите вас-нашата домашна задача е да објавиме конкурс со кој ќе ве поканиме и вас кои сте заинтересирани да ни се приклучите во проектот со ваша лична творба.

Информациите ќе бидат објавени на веб страните на двете училишта.

Учесници во проектот – наставниците Роза Јаневска и Дитурие Сејфедини со ученици од V, VI и VIII одд.

Учество на Националната Франкофонска Вечер

На 9 април 2025 година, во Свети Николе се одржа Франкофонска вечер во рамките на проектот „Франкофонијата ја истражува Северна Македонија“, организиран од фондацијата Бел Идеал во соработка со локалните училишта.

120 млади од 12 училишта во 6 градови го прославија францускиот јазик преку различни уметнички изрази, во присуство на Претседателката на Република Македонија и Амбасадорот на Франција во Македонија.

Нашето училиште го претставија Анастасиа од 6-1 и Михајло од 6-2 со скечот Фудбал.

Одговорен наставник – Анета Митевска