Членовите на драмскиот, новинарскиот и ликовниот клуб од ООУ “Дане Крапчев” вклучени во проектот “И јас имам глас” преку Фондацијата за образовни и културни иницијативи “Чекор по чекор” на 26.11.2019, среда, повторно остварија работна средба со Дени од драмската школа во МКЦ. Два часа, во прекрасна работна атмосфера, преку глума, новинарски статии и цртежи имаа можност да ги искажат своите задоволства и разочарувања од почитувањето на детските права од страна на возрасните во и вон училиштето. Целта на овие работилници е да се придонесе во градењето на критички и креативни ставови кон искажувањето мислења на децата во однос на нивните права и потреби во општеството. Овие работилници не завршуваат тука, напротив со секоја средба се раѓаат нови идеи кои потекнуваат токму од умните глави на нашите идни глумци , новинари и ликовни уметници. Следна работилница со зададени задачи за училишниот клуб за детски права е планирана за во декември.

На 26.11.2019, вторник, учениците од одделенска настава го посетија фестивалот “Златно славејче” кој се одржува по 49 пат во нашиот град. Учениците понесени од звуците на музичките рефрени со голем интерес го следеа фестивалот и уживаа во друштво со многу ученици од други училишта и новите музички ѕвезди.

Ученикот Павел Наневски од 9 одд.  на ден 23-11-2019 учествуваше на манифестацијата “Ноември-Месец на науката” кој се одржа на Природно-математичкиот факултет. Настанот беше од натпреварувачки карактер, на кој  учениците кои покажуваат интерес во област на природни науки  ги презентираат своите исражувачки активности.

Павел Наневски  го претстави  својот истажувачки труд и експеримент на тема  “ДНК –Градба и значење”,изработен  под менторство на наставничката по биологија Бојана М.Личева

Ученикот спроведе сопствено истажување за ДНК молекулата и упешно успеа да изведе експеримент за изолирање на човечка ДНК и ДНК од банана.

За својот истражувачки експеримент оваа година е добитник на трета награда од стручното жири на Македонското Биолошко Друштво.

Се надеваме дека овие активности и достигнувања ќе бидат мотив и за останатите ученици да истажуваат во оваа област.

                   На ден 22.11. 2019г. ученици од нашето училиште заедно со предметните наставници и директорката ја посетија Народната банка на Република Северна Македонија со цел учениците да се запознаат со Народната банка како институција.

Учениците проследија презентација преку која на интересен начин се запознаа со работата на банката, економските поими, штедењето, финансиските производи, како и заштитата на корисниците на финансиските услуги. Исто така учениците имаа можност да го посетат Музејот на Народната банка  каде што преку постојаната музејска поставка се запознаа со развојот на монетарните системи и нивните стандарди во општествата што оставиле свој белег во историјата на државата. Ја разгледаа  Нумизматичка збирка од појавата на пајонските монети па се до збирката на современи монети.

 На крајот на учениците им беа поделени едукативени материјали – брошури  во кои на интересен начин се објаснети и претставите на македонските банкноти инспирирани од културното наследство

• 

• 

На 15.11.2019г во нашето училиште се одржа регионален натпревар во спелување по француски јазик за седмо одделение на кој што зедоа учество и ученици од нашето училиште : Алексеј  Стојановиќ од 7-3 одд, Јована Деановска од 7-4 и Стефан Јанковски од 7-4. Тие постигнаа голем успех и тоа:

Алексеј се пласираше на 2 место,

Јована 3 место

и Стефан 4 место.

Сите тројца продолжуваат на Државниот натпревар кој ќе се одржи на 30 ноември 2019г.

Браво ученици и многу успех понатаму!

Ментор: Јасмина Ѓоргиева

На следниот линк можете да го погледнете распоредот за додатна, дополнителна и воннаставни активности за секој наставник

https://drive.google.com/open?id=1wrGJkeoca4tZv6pDE0w0RLNmInEZ7RhB

На 31 октомври 2019 во ООУ “Григор Прличев” се одржа книжевната манифестација “Есен во Гази Баба – 2019″за која твореа ученици од сите основни училишта во Скопје. Беа прочитани фрагменти од наградените есеи меѓу кои е и есејот на Клара Караџовска од 6-2 одд. од нашето училиште. Во продолжение наградениот есеј

                  Годишното време кое многу ме разнежнува

         Есента дојде! Есента дојде!

         Ќе ме запрашате како и од каде знам.

        Ја видов! И пак ќе речете: како можеш да ја видиш? Ја видов, навистина.

     Таа не дојде одеднаш, во само еден миг, туку доаѓаше постепено и тивко со своите жолтеникаво-кафени бои и со сета своја убавина, но јас го видов нејзиното доаѓање. Јас забележав одненадеж дека во нашиот двор на старата липа убавите, зелени листови и стануваа постепено жолти, па потоа потемни и на крај добија кафена боја и почнаа да паѓаат на земјата. Сега кога одам по дворот, кафените листови шушкаат под моите нозе и создаваат многу пријатен звук, како да шумолат. И старата јаболкница веќе има жолто-кафени листови, но таа има и убави ,крупни, зрели плодови, кои ги собравме за во зима. На лозницата, што дедо ми ја имаше одамна засадено во дворот и оваа година има убави крупни гроздови, а тие се веќе сосема созреани. Грозјето има слатко-киселкаст вкус кога го јадеме, но бидејќи не можеме да го изедеме целото, дедо ми издвои еден дел и направи вино и свари ракија од него. Во нашиот двор ја нема веќе ни раззленетата трева која цело лето ја залевавме со вода. Се исуши, а на местото на зелените тревки сега ѕиркаат сиви ,исушени сламки, но и тие имаат многу убави и различни бои што се прелеваат во различни нијанси. Но ,не се само овошките ,тие по кои забележав дека есента дојде. Мојата јакничка која од минатата година стоеше во плакарот, сега е извадена на закачалката, затоа што кога наутро одам на училиште ми пристудува. Ги нема веќе високите температури кои летото на заминување ги однесе со себе.Сега температурите паднаа, а денот завршува многу порано. Веќе во пет часот сончевите зраци полека се сокриваат зад хоризонтот, а темнината се надвиснува над денот.

  Сепак, покрај сите обврски и промени, јас ја сакам есента. Навистина ја сакам, затоа што таа е годишното време со најмногу бои. Малку ми е жал затоа што нема веќе игри во дворот со другарките, веќе почнаа нашите училишни обврски, па не ни останува многу време за игра. Не можеме да го дочекаме крајот на денот надвор, во игра, затоа што училишното ѕвонче одамна не повика во училишните клупи, па моравме да заборавиме на безгрижните игри на правливата улица. Тоа безгрижно време сега го заменивме со пишување училишни задачи дома, покрај печката од која се шири пријатна топлина, а дрвцата што горат прават убава црвена жар и шират прекрасен мирис на топол дом. Мирисот е надополнет со мирисот на компотот што баба ми го вари на истата таа печка приготвен од резанки од зрели круши и јаболки, кој јас и сестра ми го пиеме додека е топол, а верувајте ми, има прекрасен вкус. Есента ја видов и на улица, кога со мајка ми одевме да завршуваме некои обврски за дома. Не е само мојата јакна извадена од плакарот, и другите луѓе ја пронашле својата есенска облека , па ги нема веќе летните куси маички на прерамки, шарените здолништа и кусите панталони. Сите луѓе се сокриени под дебелите палта, мантили и јакни, а по некои носат и чадори затоа што небото се мршти, покриено е со облачиња и најавува дождливи денови. Но јас немам време да размислувам за дождот, зашто носот ми го скокотка мирисот на печен клас од пченка и печени зрна костени, што ги продаваат уличните продавачи, а мирисот станува уште посилен додека поминуваме покрај нив и гледаме во малите црни плотни на кои ги прпелкаат и печат. Мајка ми ни купува по еден фишек со топли костени, а јас и сестра ми ги префрлуваме од рака во рака, зашто се врели, па нашите малку смрзнати раце не можат да ја издржат топлината. Но, нестрпливи сме да ги пробаме, а на помислата на нивниот убав вкус кој не сме го пробале од минатата есен, ни се создава плунка во устата.

      Тоа е есента, си помислувам, таа има толку убав вкус! Вкус на многу зрели овошки, вкус на постудено време, вкус на топла облека. Таа е предвесник на зимата, но додека да дојде зимата, ние имаме време убаво да се изнауживаме во нејзините прекрасни зрели вкусови и подготвени да ја дочекаме студената зима.

OOУ Дане Крапчев    ментор Јагода Филиповска                                                                            Клара Караџоска VI-2

     Во период од 28.10 до 02.11.2019 г. учениците од  V-1   одделение од ООУ ,,Дане Крапчев” –Скопје и нивната наставничка Данче Костовска – Јакимовска имаа несекојдневна можност да бидат домаќини на наставникот  Роби Костовски – кои 16 години работи како наставник  по физичко и здравствено образование со ученици од VII до IX одд.во Шведска.

     Беа реализирани  несекојдневни  часови со многу динамика, тимски игри, часови на кои на прво место беше развивањето на  тимскиот дух, почитувањето на правилата на игра, градењето чесен однос кон соиграчот и противникот, правилното користење на реквизитите, јакнењето на самодоверба ,упорноста и желбата за успех и напредок.

     Игрите: ,, Јоши”;  ,, Јенка”;   ,,Кинески ѕид”; ,, Изгорена топка”;  ,,Опавче”; ,, Кенгури”;                   ,,Воз”; ,,Кој помалку”;  ,, Каде е топката”  ;и многу други предизвикуваа големо воодушевување , правилата беа совладувани брзо ,а игрите –изведувани со големо задоволство.Часовите траеа повеќе од предвиденото , а замор не постоеше.

     Учениците имаа можност преку видео презентации да видат во какви услови и на кои начин се изведуваат  часовите по физичко и здравствено образование во Шведска.

   Од остварената соработка користа за наставникот беше непроценлива –задоволството и радоста кај учениците немерливи.

   На разделбата имаше многу емоции и ветувања. Наставникот го испративме со изработена ,,Книга на спомени “ .Секој учениk даде ветување дека спортските активности ќе  бидат дел од неговото секојдневие, наставничката даде ветување дека ќе го применува виденото и наученото ,а наставникот Роби ни вети повторна средба и ни порача:

                                   Избери здравје – избери спорт !

                                                            Здраво тело-здрав дух –здрава нација !

На следниот линк може да го погледнете видеото од оваа убава соработка

https://drive.google.com/file/d/0Bxmo1t5pSm5GaTI3TW93RlNib0pBd3lmVV9ZQ0dBbU9WYWpr/view?usp=sharing