Нашето училиште оваа седмица беше дел од кампањата,, ЧИТАЊЕТО Е СУПЕР МОЌ” која ја реализираше издавачката куќа ,,АРС ЛАМИНА” со поддршка од општина Гази Баба. Оваа издавачка куќа ги израдува учениците со донацијата од 100 книги со кои ни го збогатија библиотечниот фонд. Нашите ученици со радост и љубопитство ја примија донацијата и порачаа: ,,Не постои полојален пријател од книга, нема поисполнети денови од детството од оние поминати со омилената книга” ” Читајте за да станете моќни !

Убаво е чувството кога ќе добиете нешто ново, а уште повеќе кога ќе добиете подарок од некој кој постојано ве поддржува во сите активности. Така Францускиот Институт од Скопје, постојано ги поддржува сите наши активности по повод Франкофонијата и промоцијата на францускиот јазик.

Во оваа прилика би сакале да искажеме голема благодарност за донацијата на литература на француски јазик до Францускиот Институт – Скопје и до Амбасадата на Франција.

Библиотеката во ООУ„Дане Крапчев“ е збогатена со книги на француски јазик, соодветни на нивото на знаење и возраста на учениците. Во дел од книгите вклучено е и ЦД што ќе им помогне на учениците за полесно да го совладаат изговорот и читањето, а исто така има и вежби за разбирање по секое поглавје од книгата.

Денес во библиотеката дојдоа учениците од седмо одделение кои се членови на Франкофонскиот клуб за да ги разгледаат новите книги. Заедно со наставничката Анета реализираа работилница во која работеа на текст од книгата “Top secret”. Учениците се уверија дека книгите се пишувани на лесен француски и комплетно разбирливи за нивно ниво. По работилницата си заминаа задоволни и изразија желба повторно да се организира работилница на која ќе читаат незадолжителна француска литература преку што ќе ги збогатат своите знаења.

Во текот на првото полугодие со ученици од осмо и седмо одделение беа  организирани неколку работилници за изработка на  украсни кеси од рециклирана хартија. На кесите учениците испишаа зборови и изрази на повеќе јазици кои ги користат етничките заедници кои живеат во нашата држава.

   Учениците научија како се изговараат на повеќе јазици изразите : “Благодарам”, “Добар ден”, “Како си ?”, “Како се викаш?”, а воедно пратија и порака  за  толеранција, рамноправност, права, соживот, правда, заедништво, мир.

     Со креативно изработените  еко кеси учениците покажаа  и колку добро може да изгледа рециклираната хартија и  ја подигнаа  свеста за користење на материјали кои може да се рециклираат.

    Со средствата собрани од продажната акција на кесите,  спроведена помеѓу учениците беа набавени неколку книги за училишната библиотека, со што учениците дадоа скромен придонес  за збогатување на библиотечниот фонд.

На 31.01.2020, нашата училишна библиотека го зголеми фондот на литература за деца на англиски јазик за 101 книга и 2 мини речници. Книгите пристигнаа во училиштето како донација од непрофитна организација –Darien Book Aid од Connecticut – USA, благодарение на ангажманот на предметниот наставник по англиски јазик – Катерина Лукарова. Сите ученици од нашето училиште ги покануваме да ја користат и позајмуваат и оваа литература од библиотеката со цел надополнување и подобрување на знаењата од англиски јазик. Библиотекар – Жаклина Атанасовска

На 28.10.2019 г. во холот на  ООУ,,Дане Крапчев,, се одржа изложба на донираните книги кои во месецот на книгата беа собрани во акцијата што се спроведуваше   под мотото: ,,Подари книга на другарите твои, со нив сподели знаења свои,,; ,,Прочитав јас,прочитај и ти,,. Над 400 книги беа донирани од учениците и наставниците во училиштето и истите беа изложени каде на сите ученици, родители и наставници им се даде можност да ги разгледаат и да ги користат позајмувајќи ги од училишната библиотека каде што ќе се чуваат.

На најголемите донатори,ученици и наставници, им беа поделени благодарници од директорот на училиштето.

Преку оваа успешно завршена активност учениците упатија порака до нивните соученици дека читањето книги е како сонување со отворени очи,не постои поубав мирис од мирисот на стара, добра книга,- па затоа доколку сметате дека некоја книга е стара, не ја фрлајте, подарете  ја некому или пак оставете ја во најблиската библиотека,таа таму повторно ќе се роди!

Ние учениците, членови на драмско-рецитаторска, новинарска и литературна секција поттикнати од одбележувањето на „Месецот на книгата“ и „Денот на јазиците“, а со поддршка на нашите предметни наставници по македонски јазик, одделенските наставници на нашите помали другари од I до V одд., библиотекарот од нашето училиште, решивме да спроведеме акција под мотото:

„Подари книга на другарите твои

и со нив сподели знаења свои“

„ Прочитав јас – прочитај и ти“

             Целта на нашата акција е да го збогатиме нашето училишно катче, библиотека – медијатека  со разновидна  домашна и странска литература која ќе може да ја користи секој од нас, а читајќи книги да уживаме во пишаниот збор, да ги збогатиме нашите знаења и нашите погледи кон светот за полесно да чекориме напред.

              За таа цел  ве повикуваме вас учениците, вашите родители, наставниците, сите заедно да донираме книги од македонската и странска литература (германска, англиска, француска, спрска, албанска……..) да бидеме успешни и да го уживаме благодетот од пишаниот збор , читајќи книги на секој  јазик.

              Акцијата ќе биде спроведена од 7 до 18 Октомври. Подвижниот штанд ќе поминува секој ден во секоја паралелка каде ќе можете да ги предадете вашите донирани книги во кои може да напишете ваша посвета.

Последниот ден, донираните книги ќе бидат изложени во училишниот хол. Секој ќе може да ги разгледа, а потоа и да ги користи. Ќе бидат истакнати најуспешните донатори и ќе им бидат доделни  благодарници.